Styrkir til varðveislu og sjálfbærrar nýtingar erfðaauðlinda í landbúnaði

Meginhlutverk erfðanefndar landbúnaðarins er að vinna að varðveislu og sjálfbærri nýtingu erfðaauðlinda í landbúnaði. Í því skyni hefur nefndin ákveðið að verja fjármunum í að styrkja einstök afmörkuð verkefni sem falla að því hlutverki. Vísað er til stefnumörkunaráætlunar erfðanefndar varðandi nánari áherslur nefndarinnar, sjá vefsíðu nefndarinnar; www.agrogen.is

Lögð er áhersla á að styrkja verkefni á eftirfarandi sviðum:

• rannsóknir er lúta að varðveislu og viðhaldi á erfðaauðlindum í landbúnaði
• lokaverkefni til prófs á háskólastigi er tengjast varðveislu og nýtingu á erfðaauðlindum í landbúnaði
• aðgerðir sem stuðla að sjálfbærri varðveislu og nýtingu erfðaauðlinda í landbúnaði
• kynning og fræðsla fyrir almenning um erfðaauðlindir í landbúnaði og gildi þeirra

Á vef erfðanefndarinnar er fjallað um þá fjóra meginflokka lífvera sem nefndin fjallar um. Þær eru búfé, ferskvatnsfiskar, plöntur og skógur. Fram kemur á undirsíðunni um skógrækt að til tegunda íslenskra trjáplantna teljist birki, víðitegundir, reyniviður, blæösp, rússalerki, sitkagreni, alaskaösp, stafafura, aðrar trjátegundir, garð- og landslagsplöntur.

Einstaklingar og félagasamtök eru hvött til að sækja um styrki til verkefna sem hafa það að markmiði að stuðla að varðveislu og sjálfbærri nýtingu innlendra erfðaauðlinda í landbúnaði. Að jafnaði verða veittir styrkir á bilinu kr. 200 þúsund kr. upp í eina milljón króna. Sérstök eyðublöð má finna á vef erfðanefndar, www.agrogen.is.

Umsóknum skal skilað til Birnu Kristínar Baldursdóttur, Landbúnaðarháskóla Íslands, Hvanneyri, 311 Borgarnes (birna@lbhi.is) fyrir 28. apríl 2022.