Fyrirtæki áhugasöm um skógrækt – skattaafsláttur í boði

Mjög rýrt og illa farið land í Breiðdal breytist brátt í gjöfulan skóg sem bindur kolefni fyrir tilstilli samtakanna One Tree Planted sem safna fé til slíkra verkefna víða um heiminn. Ljósmynd: Þröstur Eysteinsson

Fyrirtæki sýna skógrækt aukinn áhuga en þau geta nú lækkað skattstofn sinn um 0,75% af veltu með aðgerðum til kolefnisjöfnunar. Skógræktarstjóri segir nóg pláss fyrir nýjan skóg í landinu. Erlend samtök ætla að gróðursetja í Breiðdal fyrir næstum 50 miljónir króna.

Þetta kom fram í hádegisfréttum Útvarps í dag. Þar ræddi Rúnar Snær Reynisson fréttamaður við Þröst Eysteinsson skógræktarstjóra. Rifjað var upp að Skógræktin hefði hvatt til þess að nýskógrækt yrði fjórfölduð til að auka bindingu kolefnis og skapa 250 ný ársverk og þegar aðgerðaáætlun stjórnvalda í loftslagsmálum var kynnt fyrir tveimur árum hefði verið talið að mögulegt væri að tvöfalda eða þrefalda árlega gróðursetningu. Skógræktarstjóri segir í viðtalinu að síðan þetta var hafi gróðursetning aukist úr þremur í fimm milljónir plantna. Þar muni mikið um hálfa milljón birkis sem var atvinnuátak vegna COVID-19. Allt stefni í að tvöföldun náist árið 2023, með gróðursetningu 6 milljóna plantna. Þá verði plantað í 2000 hektara sem auki árlega bindingu kolefnis um 20 þúsund tonn. Fyrirtæki bæði innlend og erlend sýni skógrækt meiri áhuga.

Þá segir Þröstur orðrétt:

„Við höfum verið að vinna með Landsvirkjun í nokkur ár en nú hafa önnur fyrirtæki sýnt áhuga. Til dæmis í sjávarútveginum. Þar koma til dæmis til breytingar á skattalögum þannig að það er hægt að fá skattafslátt upp að ákveðnu marki fyrir meðal annars að rækta skóg. Svo erum við með nýjan samning við erlendan aðila sem heitir One Tree Planted þar sem þeir ætla að fjármagna skógrækt á Ormsstöðum í Breiðdal. Það eru 140 hektarar þar sem Skógræktin á og verður gróðursett í á næstu tveimur árum. Þannig að þeta er aðeins byrjað að verða að veruleika að fyrirtæki komi sterkt inn,“ segir Þröstur.

Tíundað er í fréttinni að gróðursett verði fyrir 49 milljónir króna í Breiðdal fyrir þessi alþjóðlegu samtök, One Tree Planted, sem vinna að því að safna fjármunum frá fyrirtækjum og einstaklingum til skógræktar víða um heim. Haft er eftir Þresti að nægt pláss fyrir plöntur í fjölmörgum skógræktarverkefnum um allt land. Skipuleggja megi nýja skóga án þess að trufla önnur landnot eða skerða útsýni.

„Strax og maður nefnir skóg þá er landið að sökkva í skógi. Eða strax og maður nefnir skóg þá er allt útsýni úr myndinni. Það er auðvitað hjákátlegt að halda þessu fram. Þessum ýkjum. Ræktaður skógur þekur núna hálft prósent af Íslandi. Það má finna einhverja bletti þar sem skógur er fyrir útsýni. En að þetta sé eitthvert almennt vandamál eða að þetta sé eitthvert verðandi vandamál, það er náttúrulega bara út í hött,“ segir Þröstur Eysteinsson, skógræktarstjóri, í samtali við Ríkisútvarpið

• Fréttin á vef Ríkisútvarpsins
• One Tree Planted styður skógrækt á Íslandi (frétt frá 5. október 2020)

Texti: Pétur Halldórsson