Starfshópur leggur til sameiningu skógræktarstarfs í eina stofnun

Blágresið blíða. Mynd: Esther Ösp Gunnarsdóttir

Starfshópur um sameiningu skógræktarstarfs ríkisins leggur til við umhverfis- og auðlindaráðherra að það verði sameinað í eina stofnun. Um er að ræða starf Skógræktar ríkisins og landshlutaverkefna í skógrækt; Vesturlandsskóga, Skjólskóga á Vestfjörðum, Norðurlandsskóga, Héraðs- og Austurlandsskóga og Suðurlandsskóga, auk umsjónar með Hekluskógum.

Sigrún Magnúsdóttir, umhverfis- og auðlindaráðherra, skipaði starfshópinn í júní síðastliðnum og hefur hann nú skilað greinargerð sinni. Starfshópurinn er sammála um að sameining landshlutaverkefnanna og Skógræktar ríkisins í eina stofnun sé æskileg og skapi tækifæri fyrir framþróun og eflingu skógræktar í landinu. Meðal helstu verkefna stofnunarinnar yrðu skipulag og ráðgjöf við nýræktun skóga, umhirðu og nýtingu, umsjón þjóðskóga eins og Hallormsstaðaskógar og Vaglaskógar, rannsóknir í skógrækt og fræðsla og kynning.

• Greinargerð starfshóps um sameiningu verkefna á sviði skógræktar
  

Frétt af vef umhverfis- og auðlindaráðuneytisins