Að hnita gróðursetningar með GPS

Auðvelt er nú orðið að hnita útlínur gróðursettra reita með hjálp snjallsíma og einfaldra smáforrita.

Skógræktin gefur út myndband og leiðbeiningar fyrir skógarbændur

Út er komið á vegum Skógræktarinnar mynd­band ásamt skriflegum leiðbeiningum þar sem útskýrt er á skilmerki­legan hátt hvernig hnita má útlínur gróður­setningar­reita með hjálp GPS-tækni. Hver sem er getur nú kortlagt framkvæmdir á skóg­ræktar­svæðum sínum jafnóðum með snjall­síma og einföldu smáforriti. Ítarlegri leið­beiningar eru einnig komnar á vefinn skogur.is

Tækninni fleygir stöðugt fram og nú er svo komið að auðvelt er fyrir skógarbændur og aðra skógræktendur að hnita upp jafnóðum allar framkvæmdir sem unnið er að á skóg­ræktar­svæð­um. Auk hefðbundinna GPS-tækja er nú auðvelt að nýta smáforrit sem fáanleg eru í snjallsíma. Stefna Skóg­ræktar­innar er að skógar­bændur sjái sjálfir um þessa kort­lagningu.

Einkum er hér átt við gróðursetningar. Í þeim leiðbeiningum sem fáanlegar eru á skogur.is í pdf-skrá er farið yfir þær tæknilegu leiðir sem færar eru til að skrá gróðursetningar jafnóðum. Farið er í gegnum hvernig skrá má staðsetningu svæðis sem gróðursett er í og hvernig þessum upplýsingum skuli skilað til skógræktarráðgjafa Skógræktarinnar. Lýst er tveimur gerðum af GPS-tækjum. Einnig er bent á smáforrit sem setja má upp í snjallsíma.

Ástæða er til að vekja athygli á myndbandarás Skógræktarinnar á Youtube. Hér fyrir neðan má hlaða niður pdf-skrá með leiðbeiningum um skráningu gróðursetninga með GPS-tækni, þar fyrir neðan er hlekkur á myndbandarásina og neðst er sjálft myndbandið um GPS-skráninguna.

• Skráning gróðursetninga jafnóðum með GPS - leiðbeiningar
• Myndbandarás Skógræktarinnar á Youtube

MYNDBAND um skráningu gróðursetninga með GPS-tækni

Texti: Pétur Halldórsson