Áhugaverð námskeið fram undan

Áhugasamir nemendur reyna sig við öruggu hnífsbrögðin

Trjáfellingar, grisjun, viðarnytjar

Ástæða er til að vekja athygli á nokkrum námskeiðum sem eru á dagskrá Endurmenntunar Landbúnaðarháskóla Íslands á næstu vikum og mánuðum og gætu freistað skógræktarfólks og áhugafólks um viðarnytjar.

Tvö námskeið um notkun og viðhald keðjusagar eru á dagskránni, það fyrra verður seinna í janúarmánuði á Reykjum í Ölfusi og það síðara á Hólum í Hjaltadal í lok apríl. Kennd verður trjáfelling og grisjun með keðjusög, farið yfir öryggisatriði, viðhald keðjusagar og smærri viðgerðir og fleira. Kennsla er bæði bókleg og verkleg.

Hin sívinsælu námskeið Húsgagnagerð I og II verða haldin á Snæfoksstöðum í Grímsnesi í marsmánuði. Þessi námskeið hafa þróast upp úr námskeiðinu Lesið í skóginn tálgað í tré sem hefur verið kennt í frá árinu 2001 og notið mikilla vinsælda. Kennd er nýting grisjunarefnis, eiginleikar viðartegunda og nýting, smíði kolla og bekkja, samsetning á fersku og þurru efni, yfirborðsmeðferð og fúavörn ásamt fleiru.

Framhaldsnámskeiðið Húsgagnagerð II hefur verið kennt í frá árinu 2009 og einnig notið mikilla vinsælda. Þar er kafað dýpra í viðfangsefnið og læra þátttakendur að sækja sér efni í skóg til að útbúa greinahaldara, dýr og húsgögn. Fjallað er meðal annars um umhirðu og viðargæði trjágróðurs, eiginleika og galla einstakra íslenskra viðartegunda og yfirborðsmeðhöndlun eða viðarvörn inni- og útihúsgagna.

Loks má nefna námskeiðið Tálgun 1, ferskar viðarnytjar sem fram fer á Hólum í Hjaltadal um mánaðamótin mars-apríl. Á námskeiðinu lærir fólk öruggu hnífsbrögðin sem auka afköst og öryggi í tálgun með hníf og exi.

Nánar um námskeiðin á viðburðasíðu Skógræktarinnar og vef Endurmenntunar LbhÍ.

• Viðburðasíða Skógræktarinnar
• Vefur Endurmenntunar LbhÍ

Texti: Pétur Halldórsson