Áhugi á innlendum jólatrjám

Stafafura er vinsælasta íslenska jólatréð, ilmar vel og heldur barrinu örugglega fram yfir jólin. Myndin er tekin hjá Sólskógum í Kjarnaskógi. Mynd: Pétur Halldórsson.

350 tré send að austan til Hafnarfjarðar til að anna eftirspurn

Nýlega sendu skógarbændur á Austurlandi 350 jólatré til Skógræktarfélags Hafnarfjarðar. Félagið hefur átt bágt með að anna eftirspurn eftir íslenskum jólatrjám og því komu trén að austan sér vel. Jólatrjáarækt hjá skógarbændum fer smám saman vaxandi og búast má við því að hlutdeild skógarbænda á jólatrjáamarkaðnum fari vaxandi á komandi árum. En til þess að íslensku trén geti náð stærri hluta kökunnar þurfa neytendur að vera ánægðir með vöruna og þjónustuna á sölustöðum.

Þetta segir Else Møller skógfræðingur, einn helsti sérfræðingur landsins um jólatrjáarækt. Á jólatrjáavefnum sem er að finna hér á skogur.is fer Else yfir þau verkefni sem jólatrjáabændur þurfa að sinna í desembermánuði. Þegar komið er svo nærri jólum er þó einnig mikilvægt að ýmis verk hafi verið unnin fyrr um haustið til að allt gangi sem best. Þá er ekki gott að vera í þeirri stöðu sem við getum ímyndað okkur að Grímur sé í vísunni góðu:

Nú er úti veður vott,
verður allt að klessu.
Ekki á hann Grímur gott,
að gifta sig í þessu.

Vonandi er Grímur ekki jólatrjáabóndi sem á eftir að fara út og leita að jólatrjám sem hann hefur lofað fyrir komandi jólamarkað. Allt er á kafi í snjó og ofsaveðurspá annað slagið. Ef Grímur hlustar svo á auglýsingar í útvarpinu þar sem auglýstur er nordmannsþinur fyrir 3995 kr. er ekki víst að hann nenni að standa í þessu yfirleitt.

Fyrir hina sem fóru út í september og merktu trén sem voru tilbúin fyrir sölu er verkið mun auðveldara. Reyndar er alltaf erfitt að taka tré út úr skóginum þegar snjóskaflarnir eru komnir í mittishæð og borgar sig varla ef maður þarf að aka eða ganga langa leið til að komast að trjánum.

Þetta atriði er gott að hafa í huga þegar nýtt svæði fyrir jólatré er valið. Svæðið á að vera aðgengilegt – líka í nóvember og desember – og trén á að gróðursetja innan afmarkaðs svæðis. Til dæmis gæti verið reitur A með x fjölda af trjám sem öll eru gróðursett á sama ári. Árið eftir er gróðursett í nýjan reit með y fjölda af trjám. Þetta auðveldar umhirðuna frá upphafi til enda.   

Íslensk jólatré eru vinsæl hjá mörgum en ekki átta sig allir á muninum á innfluttu og íslensku tré. Því er upplagt að setja greinilegt merki á hvert jólatré sem gefur til kynna að tréð sé ræktað á Íslandi og hvar (bær, landshluti).

Annað snjallræði er að láta leiðbeiningar fylgja trénu með upplýsingum um trjátegundina og hvernig best sé að meðhöndla tréð þegar komið er heim í stofu, svo sem með því að saga neðan af leggnum áður en tréð er sett í fótinn, að bæta við vatni á hverjum degi og þess háttar.

Á sumum sölustöðum er líka hægt að kaupa jólatrésfót með trénu og margar mismunandi útfærslur eru í boði eins og sést á myndinni hér til hliðar. Það sem skiptir máli er að fóturinn sé stöðugur, stillanlegur og örugglega vatnsþéttur.

Íslensk jólatré eru í boði á mismunandi stöðum á Íslandi og flest tré eru annað hvort fengin hjá skógræktarfélögum eða Skógrækt ríkisins vítt og breitt um landið. Skógarbændur eru þó líka farnir að framleiða jólatré, aðallega þó á Austurlandi enn sem komið er. Hér fyrir neðan má sjá hvaðan íslensku jólatrén eru í aðalatriðum. Smellið á myndirnar til að sjá þær stærri og skýrari.

• Jólatrjáavefur
  

Texti: Pétur Halldórsson og Else Møller