Grænmetisflutningar kolefnisjafnaðir

Sölufélag garðyrkjumanna hefur gert samning við Kolvið um skógrækt til bindingar þess kolefnis sem losnar við flutninga á vörum grænmetisbænda alla leið í verslanir. Markmiðið er að grænt verði enn grænna og kolefnisfótspor grænmetisins verði jafnað að fullu.

Sagt er frá þessu á vef Hringbrautar á þessa leið:

Sölufélag garðyrkjumanna (SFG) og Kolviður hafa undirritað samning um að flutningur á öllu grænmeti frá grænmetisbændum í SFG alla leið í verslanir verður kolefnisjafnaður að fullu. Þetta stóra græna skref er tekið með gróðusetningu á þúsundum trjáa og kolefnisfótspor alls grænmetisins eru jöfnuð að fullu af vottuðum aðilum.

Í tilkynningu sem hefur yfirskriftina Grænt verður enn grænna kemur þetta fram um samninginn:

Samningurinn felur m.a. í sér að haldið er sérstakt kolefnisbókhald til að reikna út kolefnisfótspor í flutningum frá bónda og í verslanir. Út frá þeim gögnum er trjám plantað á tilgreindum svæðum og eru þau vernduð í 60 ár. Þannig er allur akstur vörunnar kolefnisjafnaður.

 Kolviður er sjóður sem starfar samkvæmt skipulagsskrá samþykktri af stjórnvöldum 2006 og lýtur eftirliti Ríkisendurskoðunar. Stofnendur sjóðsins eru Skógræktarfélag Íslands og Landvernd með stuðningi ríkisstjórnar Íslands, en markmið hans er binding kolefnis í gróðri og jarðvegi til að draga úr styrk koltvíoxíðs (CO₂) í andrúmslofti. 

 Samkvæmt mælingum á flutningi grænmetis frá framleiðendum hefur Kolviður gróðursett tré sem jafnar út kolefnisfótsporin og sú vinna mun halda áfram um ókomin ár. 

Gunnlaugur Karlsson, framkvæmdastjóri Sölufélags garðyrkjumanna segir m.a.:  

„Yfir áratugur liðinn frá því að við hættum allri notkun frauðplasts, tæp 10 ár frá því að allri notkun á plastbökkum var hætt og bakkar úr endurvinnanlegum pappa teknir upp í staðinn, fljótlega koma á markað jarðgerðanlegar umbúðir unnar úr jurtasterkju og einnig eru væntanlegir kartöflubréfpokar fyrir okkar kartöflur. Að kolefnisjafna nú akstur grænmetisins er eðlilegt næsta skref“.

Reynir Kristinsson, framkvæmdastjóri Kolviðs bætir við: 

 „Kolviðarskógar eru nú þegar á Geitasandi á Rangárvöllum og á Úlfljótsvatni og unnið er að samningum um uppbyggingu skógar við Skálholt. Frá upphafi hefur um 600.000 trjám verið plantað í Kolviðarskóga og þeim fyrirtækjum sem vilja kolefnisjafna sig fjölgar jafnt og þétt. Það er afar ánægjulegt að Sölufélag garðyrkjumanna stígi nú þetta skref og stækki enn frekar Kolviðarskóga landsins og geri grænmetið enn grænna,“ segir Reynir.

• Fréttin á vef Hringbrautar