Mælingar á íslensku skógunum í sjónvarpsfrétt

Íslensk skógarúttekt var til umfjöllunar í kvöldfréttatíma Sjónvarpsins laugardaginn 25. júní og þar var rætt við Björn Traustason, sérfræðing á rannsóknasviði Skógræktarinnar, sem er meðal þeirra sem nú fara um landið á vegum stofnunarinnar til úttektar á mæliflötum í skógum. Björn segir að kolefnisbinding í skógunum hafi aukist mikið undanfarin ár.

Amanda Guðrún Bjarnadóttir fréttamaður Ræddi við Björn á mælireit í eyfirskum skógi og fram kemur að tilgangur mælinga Íslenskrar skógarúttektar sé að mæla kolefnisbindingu íslenskra skóga. Í þessum úttektum er þó ýmislegt fleira metið og mælt, vöxtur og þrif, vistkerfi skógarins og fleira. Formlega hefur verkefnið Íslensk skógarúttekt verið í gangi frá árinu 2005 í þeim tilgangi að safna upplýsingum um skóga og skógrækt á Íslandi. Til grundvallar eru tæplega 300 mælifletir, sem er að finna víða um landið.

„Við sem sagt erum komnir hér til að meta kolefnisinnihald þessara trjáa, og það gerum við með því að mæla hæðina á þeim og þvermál,“ segir Björn Traustason í viðtalinu.

Aðferðafræðin sem unnið er eftir í verkefninu er hluti af alþjóðlegu kerfi og niðurstöður eru bornar fram í skýrslum á innlendum og alþjóðlegum vettvangi, meðal annars í tengslum við Loftslagssamning Sameinuðu þjóðanna þar sem Íslendingar þurfa að standa skil á losunar- og bindingartölum eins og aðrar þjóðir sem að samningnum standa. Björn segir mælingarnar hafa komið vel út hér á landi.