Mikill gangur í grisjun á Suðurlandi

(mynd: Hreinn Óskarsson)

Síðustu vikur og mánuði hefur verið óvenju mikil grisjun í Haukadals- og Þjórsárdalsskógum. Eru þar á ferðinni bæði starfsmenn Skógræktar ríkisins og verktakar sem ráðnir hafa verið í grisjun ákveðinna reita.

Allt efni sem fellur til í grisjuninni er selt til spænisframleiðslu, í fiskihjalla, kurl og arinvið. Í síðustu viku barst Skógræktinni í Haukadal þriggja manna liðsauki, en þar eru á ferðinni starfsmenn sem starfa í átaksverkefni Skógræktarinnar og Vinnumálastofnunar. Munu þessir starfsmenn læra grisjun skóga og vinna við grisjun a.m.k. næstu sex mánuði. Á meðfylgjandi mynd sjást starfsmennirnir Stefán, Jónas og Gatis ásamt Einari verkstjóra í Haukadal sem stendur lengst til vinstri.

Mikið af efni fellur til við grisjun skóganna og fer töluverður tími í að aka viðnum út. Bylting varð þó í útkeyrslu viðar um daginn þegar timburvagn kom í fyrsta sinn á Suðurlandið. Hefur vagninn nýst afar vel og safnast viður upp í stórar stæður. Verktakar frá Hestalist hafa sinn eigin vagn ásamt gröfu sem þeir nýta við grisjun reitanna og virðast slík tæki henta vel til að flytja efnið úr skógi.

Texti og myndir: Hreinn Óskarsson, skógarvörður á Suðurlandi