Nýr framkvæmdastjóri Héraðsskóga ráðinn

Guðmundur Ólafsson, 31 árs gamall rekstrarfræðingur á auglýsingadeild útvarpssviðs Norðurljósa, hefur verið ráðinn framkvæmdastjóri Héraðsskóga og Austurlandsskóga og kemur hann til starfa í byrjun febrúar. Guðmundur hefur síðustu ár sinnt sölustörfum hjá Norðurljósum. Þorvaldur Jóhannsson, stjórnarformaður Héraðsskóga, segir stjórninni hafa verið mikinn vanda á höndum því fjöldi hæfra einstaklinga hafi sótt um. Alls voru umsækjendur 20 talsins. Heimild: www.ruv.is

Mynd: Morgunblaðið

Guðmundur Ólafsson gegnir stöðu sölustjóra á auglýsingadeild útvarpssviðs Norðurljósa, og annast þar sölu auglýsinga á útvarpsstöðvarnar FM957 og RadíóX 103,7. Guðmundur hóf störf hjá Útvarpssviði Norðurljósa árið 1998. Heimild: www.nlc.is og www.utvarp.is

Á stjórnarfundi Héraðs- og Austurlandsskóga 30. desember var eftirfarandi bókun samþykkt:

"Stjórnin hefur kynnt sér sérstaklega fjóra einstaklinga sem hafa ólíkan bakgrunn og menntun, það er fagþekkingu og reynslu í skógarfræðum annars vegar og fagþekkingu og reynslu í rekstri og stjórnun hins vegar.

Eftir góðar umræður samþykkir stjórn að fela formanni að ganga til samninga við Guðmund Ólafsson kt: 011072-3139 rekstrarfræðing." (Frétt 06.01.2004 á heimasíðu Héraðsskóga: www.heradsskogar.is).

Guðmundur Wium, skógarbóndi á Vopnafirði og fulltrúi félags skógarbænda á Austurlandi í stjórn Austurlandsskóga, lét bóka mótmæli við ákvörðun meirihluta stjórnar.

Nýr skógræktarstjóri settur vegna ráðningar framkvæmdastjóra Héraðsskóga

Magnús B. Jónsson, skólastjóri á Hvanneyri, hefur verið settur skógræktarstjóri vegna ráðningar á nýjum framkvæmdastjóra Héraðsskóga/Austurlandsskóga en einn umsækjandinn um starfið er sonur Jóns Loftssonar, skógræktarstjóra. Þá eru tveir stjórnarmanna Héraðsskóga vanhæfir í málinu vegna tengsla við umsækjendur.
Þór Þorfinnsson skógarvörður á Hallormsstað, sem er fulltrúi Skógræktarinnar í stjórn Héraðsskóga og jafnframt undirmaður Jóns Loftssonar, þarf að víkja sæti og sömuleiðis Jóhann Gísli Jóhannsson frá Félagi skógarbænda á Héraði þar sem bróðir hans sótti um starfið. Helgi Hjálmar Bragason, sem er varamaður í stjórn Héraðsskóga, tekur sæti Jóhanns Gísla en Magnús B. Jónsson, settur skógræktarstjóri, hefur sett Jón Snæbjörnsson í stjórnina í stað Þórs í þessu máli.

20 umsóknir bárust um starf framkvæmdastjóra Héraðsskóga og hafa einhverjir umsækjenda verið í viðtölum hjá stjórn Héraðsskóga undanfarið. Í henni sitja fulltrúar Skógræktar ríkisins, landbúnaðarráðuneytis, Félags skógarbænda á Héraði og Austurlandsskóga. Þar sem stjórnarmenn Héraðsskóga eru fjórir, geta atkvæði fallið á jöfnu og ræður þá vilji stjórnarformanns, sem er fulltrúi landbúnaðarráðuneytis. Reynt verður að ráða í stöðu framkvæmdastjóra Héraðsskóga fyrir áramót. Heimild: Morgunblaðið 16. des. 2003 (http://www.mbl.is/mm/greinilegur/frett/1062909)