30.03.2011
(Mynd: Christophe Amblard)
(Mynd: Christophe Amblard)

Á sjöunda áratug síðustu aldar voru skógar gróðursettir á örfáum stöðum í löndum Skógræktar ríkisins í svokallaðar plógrásir sem gerðar voru með skoskum plógi. Var þessi aðferð notuð í litlum mæli í nokkur ár og var líklega síðast notuð á níunda áratugnum.

Síðustu ár hefur verið unnið að grisjun þessara skóga, t.d. í Haukadal. Helsta vandamálið við grisjun þessara skóga sem ræktaðir voru í plógrásum er hversu ógreiðfærir þeir eru. Erfitt hefur verið að komast með tæki inn í skógana til að ná timbrinu sem til fellur út og einnig hefur verið erfitt að ná timbri út með timburspili vegna þess hversu mikla hryggi plógrásirnar mynda.

frett_30032011_1frett_30032011_3Í síðustu viku var ákveðið að prófa að gera skógarbraut í gegn um reit einn í Haukadal og var verktakinn Eiríkur Jónsson frá Gígjarhólskoti fenginn til verksins. Notaður var stór grjótmulningstætari sem hingað til hefur tætt upp malbik og vegi. Virkaði tætarinn afar vel til að tæta upp rótarstubba og greinar sem settar höfðu verið í brautina og jafna út hryggi í plógrásunum. Eftir stendur kurlblönduð moldarbraut sem segja má að sé fólksbílafær. Tók verkið um eina og hálfa klukkustund. Er þetta mikil bylting í gerð skógarbrauta og verður hún áreiðanlega notuð í meira mæli á næstu árum.

Á meðfylgjandi mynd sjást starfsmenn Skógræktar ríkisins í Haukadal, þeir Einar, Níels og Lukasz, ásamt starfsnemanum Christophe Amblard frá Háskólanum í Savoie í Frakklandi.



















Myndir: Christophe Amblard

Texti: Hreinn Óskarsson


Til baka í yfirlit