Tré ársins er hæsta tré landsins

Tækifæri gefst til að knúsa hæsta tré landsins við athöfnina á Klaustri á mánudaginn. Spurningin er hvort tréð hefur nú náð 30 metra hæð. Ljósmynd: Pétur Halldórsson

Skógræktarfélag Íslands hefur tilnefnt hæsta tré landsins til heiðurstitilsins Tré ársins hjá félaginu þetta árið. Katrín Jakobsdóttir forsætisráðherra verður viðstödd í skóginum á Kirkjubæjarklaustri þegar tréð verður formlega útnefnt á mánudag.

Stóra spurningin er: Hefur hæsta tré landsins náð þrjátíu metra hæð? Ítarlegar mælingar hafa nú þegar farið fram á trénu, sem er sitkagreni gróðursett af heimafólki á Klaustri árið 1949. Þess hefur verið beðið í nokkur ár að fyrsta tréð á Íslandi frá því fyrir ísöld hafi náð þrjátíu metrum. Tilkynnt verður um niðurstöðu þessara mælinga við athöfnina á mánudag sem hefst klukkan sextán. Þá kemur sannleikurinn í ljós!

Öllum er velkomið að koma í skógarreitinn við Systrafoss á Kirkjubæjarklaustri og taka þátt í athöfninni. Skógurinn er þjóðskógur í umsjón Skógræktarinnar. Þar verður leikin tónlist, formaður Skógræktarfélags Íslands, forsætisráðherra og skógræktarstjóri flytja ávörp, hæsta tré landsins verður mælt og viðurkenningarskjöl afhent. Svo býður Skógræktarfélag Íslands upp á veitingar. Lambhagi ehf. styrkir viðburðinn.

Dagskrá

• Tónlist. Hjónin Zbigniew Zuchowicz, skólastjóri Tónlistarskóla Skaftárhrepps og Teresa Zuchowicz
• Ávarp: Jónatan Garðarsson, formaður Skógræktarfélags Íslands
• Mæling á Tré ársins
• Ávarp: Katrín Jakobsdóttir forsætisráðherra
• Afhending viðurkenningarskjala
• Ávarp: Þröstur Eysteinsson, skógræktarstjóri

Nánari upplýsingar um Tré ársins fyrr og nú má finna á vef Skógræktarfélags Íslands. Á skogur.is er að finna meira um skógarreitinn á Klaustri.

• Vefur Skógræktarfélags Íslands
• Skógarreiturinn á Kirkjubæjarklaustri

Frétt: Pétur Halldórsson