Tré ársins útnefnt á morgun

Skógræktarfélag Íslands útnefnir Tré ársins 2011 við hátíðlega athöfn að Greniteigi 9 í Reykjanesbæ á morgun, þriðjudaginn 13. september kl. 12:00. Þetta er í fyrsta skipti sem tré á Suðurnesjum verður fyrir valinu en þetta tiltekna tré þykir fyrirtaks dæmi um hvernig trjágróður getur vaxið og dafnað suður með sjó þrátt fyrir erfið skilyrði. Tré ársins er af harðgerðri tegund sem myndar falleg blóm síðsumars og hefur því notið mikilla vinsælda meðal garðeigenda hér á landi.

Ávörp flytja Magnús Gunnarsson, formaður Skógræktarfélags Íslands og Árni Sigfússon, bæjarstjóri Reykjanesbæjar. Þá mun Magnús veita Sigrúnu Guðjónsdóttur, eiganda trésins, viðurkenningu.

Skógræktarfélag Íslands útnefnir árlega Tré ársins. Er útnefningunni ætlað að beina sjónum almennings að því gróskumikla starfi sem unnið er um land allt í trjá- og skógrækt og benda á menningarlegt gildi einstakra trjáa um allt land.

Frétt: Skógræktarfélag Íslands
Mynd: Esther Ösp Gunnarsdóttir