Upplýsingar um skaðvalda á trjám óskast

Birkikemba í birkilaufblaði. Ljósmynd: Edda S. Oddsdóttir

Rannsóknasvið Skógræktarinnar hvetur fólk til að líta eftir skaðvöldum á trjám og runnum um allt land og láta vita ef vart verður við áberandi eða óvenjulegar skemmdir vegna smádýra, sjúkdóma, veðurs eða annars sem skemmt getur trjágróður. Myndir og greinargóðar lýsingar eru vel þegnar.

Nú þegar sumarið er í algleymingi og allt er lifnað óskar starfsfólk Mógilsár, rannsóknasviðs Skógræktarinnar, eftir því að fólk um allt land sendi upplýsingar um ástand skóga þar sem farið um, sérstaklega ef vart verður við einhvers konar óværu á trjánum. Þetta samstarf við fólkið í landinu hefur reynst afar vel undanfarin ár og eru öllum sem hafa veitt upplýsingar um skaðvalda sendar bestu þakkir.

Sérstaklega er fólk beðið um að hafa augun opin fyrir nýjum pestum á viðkomandi svæðum. Skaðvaldar eins og asparglytta, birkikemba og birkiþéla virðast til dæmis vera að dreifa sér hratt um landið um þessar mundir. Einnig væri dýrmætt að fá svar við spurningunni: „Hver/hverjir finnst þér vera mest áberandi skaðvaldarnir á trjám í þínum landshluta/svæði í ár?“

Hér fyrir neðan er hlekkur á Excel-skjal sem gæti hjálpað til við skráninguna. Þar má finna skaðvaldatöflu sem er ætluð til að fylla í upplýsingar um þær skemmdir sem fólk finnur. Einnig eru útskýringar sem hjálpa til við að fylla út í töfluna (blað/sheet 2) og listi yfir helstu skaðvalda (blað/sheet 3) raðað eftir trjátegundum. Allar viðbótarupplýsingar og hugleiðingar eru líka vel þegnar, umfram það sem beðið er um á töfluforminu!

Myndir mega gjarnan fylgja með enda geta þær verið mjög gagnlegar til að staðfesta greiningar. Allar myndir eru vistaðar í gagnagrunni þar sem skráð er hver er höfundur eða rétthafi þeirra. Gengið er út frá því að myndir sem fólk sendir  megi nota á glærum fyrirlestra (þar sem ljósmyndara er getið) en óskað verður leyfis ef ætlunin er að nota þær til opinberrar birtingar, svo sem í Ársriti Skógræktarinnar, á vefnum, í prentmiðlum o.þ.h. Vilji fólk ekki að myndir séu notaðar með þeim hætti er fólk hvatt til að geta þess um leið og myndirnar eru sendar.

Til aðstoðar við greiningar er hér líka hlekkur á ritið Skordýr í trjám og runnum, stutta samantekt sem Edda S. Oddsdóttir skógvistfræðingur tók saman fyrir nokkru og hefur að geyma myndir af öllum helstu skordýrum sem valda skaða á trjám hérlendis. Samantektin er að miklu leyti byggð á upplýsingum af vef Náttúrufræðistofnunar pödduvef Náttúrufræðistofnunar en þar er líka fróðleg síða um pöddur í náttúrunni sem gott er að skoða til að glöggva sig á hvaða skaðvaldar eru á kreiki. Einnig er vert að benda á skaðvaldavef Skógræktarinnar þar sem fjallað er um þá skaðvalda sem herja á trjátegundir hérlendis.

Nánari upplýsingar gefur Brynja Hrafnkelsdóttir á Mógilsá. Hún tekur líka við upplýsingum um skaðvalda á netfanginu brynja@skogur.is.

• Skaðvaldavefur Skógræktarinnar
• Pödduvefur Náttúrufræðistofnunar
• Skordýr í trjám og runnum