Fréttir

Sjónvarpsmaðurinn Kristján Már Unnarsson heimsótti höfuðstöðvar Skógræktar ríkisins á Egilsstöðum og líka Hallormsstað þar sem skógarvörðurinn á Austurlandi hefur aðsetur. Afraksturinn sést í þættinum Um allt land á Stöð 2 þriðjudaginn 4. febrúar.

Hallgrímur Indriðason, skipulagsfulltrúi Skógræktar ríkisins, talaði um þéttbýlisskógrækt á fræðslufundi í Gömlu-Gróðrarstöðinni á Akureyri fyrir helgi. Hann sagði mikilvægt að haldið yrði áfram að gróðursetja í bæjarland Akureyrar því enn væri mikið land eftir sem skipulagt hefði verið til skógræktar, lauslega áætlað um 400 hektarar.

Göngustafir og búsáhöld voru meðal þess sem nemendur bjuggu til hjá Ólafi Oddssyni á námskeiði sem haldið var um helgina á Sauðárkróki undir merkjum verkefnisins Lesið í skóginn.

Starfsmenn skógarvarðarins á Vesturlandi sneru sér að því að grisja skóginn í Hvammi í Skorradal því hættulegt er að fara um á Stálpastöðum vegna hálku.

Útlit er fyrir að ríflega tvöfalt meira verði notað af trjáviði til brennslu í Evrópu árið 2020 en nú er gert. Skógar Evrópu anna ekki eftirspurninni sem jókst um 50% á árinu 2010 einu. Umhverfislegur ávinningur er dreginn í efa. Tímaritið The Economist fjallaði um málið fyrir nokkru.