Fréttir

Alltaf er gaman að fara í skóginn, hver sem árstíminn er, ekki síst ef maður rekst á óvenjufalleg tré. Falleg björk, líklega af Pasvik-kvæmi, varð á vegi starfsmanna Skógræktar ríkisins í vikunni.

Svo virðist sem rótarkerfi trjáa í fjalllendi gegni mikilvægu hlutverki við að stjórna hitastigi á jörðinni. Vísindamenn hafa komist að því að hitastig hefur áhrif á þykkt lauffalls og moldar í fjallaskógum en líka á vaxtarhraða trjárótanna. Þegar rætur trjánna ná til bergefna undir moldarlaginu taka þær upp meira af efnum sem nýtast til að binda koltvísýring úr andrúmsloftinu. Vísindamenirnir segja að þetta ferli sé nokkurs konar hitastillir fyrir jörðina.

Sykurfura verður stærst af öllum eiginlegum furum. Vert væri að reyna þessa tegund hér á landi en þá þyrfti að taka fræ af trjám hátt upp í fjöllum, í það minnsta í 2.000 metra hæð, segir Þröstur Eysteinsson í pistli um vesturferð íslensks skógræktarfólks á haustið 2013.

Íslendingar flytja inn timbur árlega fyrir tugi milljarða króna. Til mikils er að vinna ef hægt er að framleiða þó ekki væri nema hluta þessa timburs innan lands. Þetta kom meðal annars fram í frétt á Stöð 2 um íslenskan skógariðnað.

Sjónvarpsmaðurinn Kristján Már Unnarsson heimsótti höfuðstöðvar Skógræktar ríkisins á Egilsstöðum og líka Hallormsstað þar sem skógarvörðurinn á Austurlandi hefur aðsetur. Afraksturinn sést í þættinum Um allt land á Stöð 2 þriðjudaginn 4. febrúar.