Fréttir

Timburflutningabílar Skógræktarinnar vekja athygli á vegum landsins þessa dagana. Á forsíðu Fréttablaðsins í dag, 16. maí, er mynd af einum bílnum þar sem verið er að stafla á hann viði úr Hallormsstaðaskógi. Viður er afhentur Elkem vor og haust og kringum áramótin.

Forsvarsmenn Skógræktar ríkisins, Skógræktarfélags Reykjavíkur og Skógræktarfélags Íslands hafa sent frá sér ályktun þar sem varað er við því að fella í fljótfærni stór sitkagrenitré sem standa við Miklubraut í Reykjavík. Trén nái sér aftur eftir sitkalúsafaraldur síðasta árs og erfiðan vetur.

Niðurskurður til landbótaverkefnisins Hekluskóga hefur verið dreginn til baka að hluta með þriggja milljóna króna viðbótarframlagi frá umhverfis- og auðlindaráðuneytinu. „Þetta er uppbót“, segir Hreinn Óskarsson, framkvæmdastjóri Hekluskóga. Viðbótarféð renni óskipt til ræktunarstarfsins. Nú eru gerðar tilraunir með að köggla birkifræ með mold og kjötmjöli.

Í Morgunblaðinu í dag, 12. maí, er fjallað um vefjaræktun berjaplantna í garðyrkjustöðinni Barra á Egilsstöðum. Fram kemur í greininni að í sumar komi á markað frá Barra vefjaræktaðar jarðarberjaplöntur og runnabláber. Fyrirtækið hefur fengið styrk til að þróa vefjaræktunaræti til að nota við jólatrjáaræktun.

Með uppvaxandi skógum gefast ný tækifæri sem grípa má til að styrkja atvinnu- og mannlíf í byggðum landsins. Skógrækt ríkisins barst bréf frá Kanada með skemmtilegri hugmynd. Hvernig væri að bjóða ferðafólki skógaferð um Ísland með fræðslu og jafnvel gróðursetningu?