Fréttir og pistlar

Nokkrir landeigendur á Skógarströnd á norðanverðu Snæfellsnesi sameinuðust um girðingar á jörðum sínum til að auðveldara og hagkvæmara væri að stunda þar uppgræðslu og skógrækt. Nú er ströndin farin að standa undir nafni sínu og þar breiðast út bæði ræktaðir skógar og villt birkiskóglendi. Girðingin nær utan um átta samliggjandi jarðir, samtals um 12 þúsund hektara. Af þessum átta jörðum er skógrækt stunduð á fimm þeirra en allur gróður á svæðinu er í mikilli framför.

Auður, heilsa og vellíðan sem norrænir skógar gefa er viðfangsefni hringborðs um norrænu skógarauðlindina sem verður haldið 9.-10. október í Koli-þjóðgarðinum í Finnlandi. Þar verður brugðið upp framtíðarmynd af sjálfbæru lífhagkerfi framtíðarinnar byggt á skógarauðlindinni.

Enn er pláss fyrir Íslendinga á tengslamyndunardegi NordGen Forest sem fram fer á Grand Hótel við Sigtún í Reykjavík 19. september. Þar er tækifærið til að þróa draumaverkefnið á sviði skógfræði, læra hvernig sækja skuli um styrki og kynnast nýju rannsóknarfólki í skoðunarferð um íslenska náttúru.

Umsagnir Skógræktarinnar og Landgræðslunnar sem sendar hafa verið vegna undirbúnings að stofnun miðhálendisþjóðgarðs ber ekki að túlka sem svo að fyrirhugaður þjóðgarður sé ávísun á örfoka land. Í athugasemdum hafa stofnanirnar komið á framfæri tilteknum atriðum sem eiga að geta nýst nefnd um miðhálendisþjóðgarð í vinnu hennar.

Kanadamenn hyggjast hrifsa af Norðmönnum heimsmeistaratitilinn í smíði háhýsa úr timbri því nú eru áform uppi í Vancouver-borg að reisa háhýsi úr krosslímdum timbureiningum sem verði fjörutíu hæðir og þar með hæsta timburbygging í heimi. Ekki er þó víst að Kanadamenn haldi forystunni lengi því Japanar líta enn hærra.