Fréttir og pistlar

Um það leyti sem haustgróðursetningu var að ljúka hjá skógræktendum vítt og breitt um landið skrifaði Þröstur Eysteinsson skógræktarstjóri grein sem birtist í Bændablaðinu 3. nóvember. Þar reifar hann vaxandi skógrækt á landinu, vaxandi þörf fyrir plöntur, verktaka og nýjar gróðrarstöðvar en einnig fræ og græðlingaefni af góðum uppruna.  Útlit sé fyrir að gróðursettar skógarplöntur nái sex milljónum á þessu ári.

Vélaverkfræðinemar við Háskólann í Reykjavík hafa hannað og smíðað nýtt tæki sem leysir tvö eldri tæki af hólmi við frævinnslu Skógræktarinnar úr könglum barrtrjáa. Vélin þurrkar bæði og klengir í sömu lotunni. Hún verður afhent Skógræktinni til notkunar í fræmiðstöðinni á Vöglum þegar prófunum og endanlegum frágangi er lokið.

Í tilefni af hálfrar aldar afmæli norræns rannsóknasamstarfs í skógvísindum verður haldin afmælisráðstefna 18. nóvember í Alnarp í Svíþjóð. Samstarfið kallast Norrænar skógrannsóknir á íslensku og Nordic Forest Research á ensku en gengur í daglegu tali undir skammstöfuninni SNS sem stendur fyrir SamNordisk Skogsforskning. Íslendingar gegna nú formennsku í SNS.

Vísindaport Háskólaseturs Vestfjarða býður til skógræktarfræðslu föstudaginn 4. nóvember þar sem Sigríður Júlía Brynleifsdóttir, skógfræðingur og sviðstjóri skógarþjónustu Skógræktarinnar, fjallar um breytingar sem orðið hafa á skógum allt frá landnámi til dagsins í dag, upphaf skipulagðrar skógræktar á Íslandi og stofnanaumhverfi skógræktar. Einnig spáir hún í spilin um framtíðina.

Þjóðkirkjan hefur bæst í hóp þeirra sem taka höndum saman varðandi endurheimt skóglendis á Íslandi. Hreinn Óskarsson, fulltrúi Skógræktarinnar, afhenti biskupi Íslands, Agnesi M. Sigurðardóttur, fjölda birkifræja til sáningar við barnamessu í Bústaðakirkju um miðjan október.