Fréttir og pistlar

Í nýútkomnu tölublaði Rits Mógilsár er kynnt úttekt á kolefnisbindingu skóglendis á Drumboddsstöðum II í Biskupstungum. Skógurinn á jörðinni, sem er bæði náttúrulegt birki og ræktaður skógur, bindur árlega um 1.200 tonn af koltvísýringi og svipaðri bindingu er spáð á hverju ári næstu tíu árin.

„Áhrif nýskógræktar á jarðveg, kolefnisforða og líffræðilega fjölbreytni á Fljótsdalshéraði“ er heiti meistararitgerðar sem Julia C. Bos ver þriðjudaginn 23. mars í náttúru- og umhverfisfræði við deild náttúru og skógar í Landbúnaðarháskóla Íslands. Rannsakað var mólendi sem hafði breyst í skóglendi með sjálfsáningu birkis eða gróðursetningu lerkis.

NordGen Forest, skógasvið norrænu erfðavarðveislustofnunarinnar, býður til vefmálþings miðvikudaginn 24. mars með yfirskriftinni „Ný tækni í plöntuframleiðslu“. Öllum er velkomið að skrá sig til þátttöku.

Þema alþjóðlegs dags skóga 2021 hjá FAO, matvæla- og landbúnaðarstofnun Sameinuðu þjóðanna, er endurreisn skóglendis þar sem skógi hefur áður verið eytt. Þetta er einmitt meginverkefni skógræktar á Íslandi enda var landið að miklu leyti vaxið skóglendi við landnám. Skógræktin hefur gefið út myndband í tilefni dagsins, sem er 21. mars.

Bjarki Þór Kjartansson, sérfræðingur á rannsóknasviði Skógræktarinnar, útskýrði í Landanum í Sjónvarpinu sunnudagskvöldið 14. mars hvernig fundið er út hversu mikinn lífmassa tré hafa að geyma. Í þættinum er líka fjallað um merkilegt starf Skógræktarfélags Reykjavíkur í Heiðmörk við skógrækt, grisjun og viðarvinnslu.