Fréttir og pistlar

Á það er bent í Morgunblaðinu í dag að skóglendi á Íslandi hafi stækkað um þriðjung á undanförnum aldarfjórðungi, úr 1.435 km3 árið 1989 í 1907 km3 árið 2014. Ræktaðir skógar hafi stækkað úr 401 km3 í 342 km3 eða um 580%. Í umfjöllun blaðsins er líka fjallað um aukna útbreiðslu birkiskóganna sem nú eru komnir í 1,5% af flatarmáli landsins og sérstaklega minnst á hversu mjög birkiskógarnir hafa breiðst út í Þórsmörk. Sú aukning er fimmföld enda svæðið verið friðað fyrir beit í 80 ár og Skógrækt ríkisins unnið þar að landbótastarfi æ síðan.

„Við höfum ýmis tækifæri til að minnka losun og auka bindingu kolefnis úr andrúmslofti. Skógrækt og landgræðsla er mikilvægur þáttur í okkar loftlagsstefnu.“ Þetta sagði Hugi Ólafsson, formaður samninganefndar Íslands í loftslagsmálum, í samtali við fréttastofu Ríkisútvarpsins í tilefni af því að í gær tilkynntu íslensk stjórnvöld Sameinuðu þjóðunum að þau ætluðu að taka þátt í sameiginlegu markmiði Evrópusambandsríkjanna og Noregs, um að minnka losun um fjörutíu prósent til ársins 2030, miðað við árið 1990.

Skógardagur Norðurlands 2015 verður haldinn laugardaginn 11. júlí í Vaglaskógi. Dagskráin hefst klukkan 13 og stendur til kl. 17. Í boði verða gönguferðir um trjásafnið og fræhúsið, helstu viðarvinnslutæki til sýnis, grisjunarvél sýnd að verki, gestir geta reynt sig í bogfimi og ýmsum leikjum, boðið verður upp á ketilkaffi, lummur og fleira og fleira.

Ísleifur Sumarliðason, skógtæknifræðingur og fyrrverandi skógarvörður á Vöglum, lést í Reykjavík mánudaginn 29. júní, 88 ára að aldri. Ísleifur tók við embætti skógarvarðar á Norðurlandi að loknu þriggja ára námi í Danmörku. Hann var skógarvörður á Vöglum í 38 ár, til ársins 1987. Útförin verður gerð frá Neskirkju í Reykjavík 7. júlí kl. 13.

Erlendir sjálfboðaliðar sem verða í hlutverki flokkstjóra á Þórsmerkursvæðinu í sumar hafa nú lokið einnar viku námskeiði þar sem þeir voru búnir undir leiðtogastarfið í sumar. Mikilvægt er að sjálfboðaliðarnir kunni vel til verka en líka að andinn í hverjum hópi sé góður í blíðu og stríðu.