Fréttir og pistlar

Störf þriggja verkefnisstjóra eru nú laus til umsóknar hjá Skógræktinni. Verkefnisstjóra kolefnisverkefna er ætlað að vinna áfram að þróun vottunarferla og hafa umsjón með kolefnisverkefnum. Í öðru lagi er starf verkefnisstjóra samstarfsverkefna með Landgræðslunni og fleiri aðilum. Þriðji verkefnisstjórinn á að vinna að þróun stafrænna lausna sem tengjast skógrækt og sjá um skipulag og framkvæmd plöntuflutninga.

Síldarvinnslan hyggst rækta skóg til kolefnisbindingar  á jörðinni Fannardal í Norðfirði. Verkefnið verður unnið í samstarfi við Skógræktina og verður hæft til skráningar í Loftslagsskrá Íslands. Þar með stefnir fyrirtækið á ábyrga kolefnisjöfnun á móti losun frá rekstri sínum.

Í sögunarmyllu Skógræktarinnar í Þjórsárdal var nýlega unnið efni til uppgerðar á gömlum bát. Langar og breiðar gæðafjalir þarf í slíkt verk og því þurfa trén sem efnið er unnið úr að vera há og sver. Fjalirnar í bátinn náðust úr einu tré úr hlíðum Skriðufells í Þjórsárdal. Það er til vitnis um vöxt og þroska íslensku skógarauðlindarinnar.

Tilraun með samspil nokkurra trjátegunda ásamt lúpínu á sunnlenskri eyðimörk gefur vonir um betri þekkingu og aðferðir til skóggræðslu á landi sem breyst hefur úr birkiskógi í auðn. Út er komið nýtt myndband um tilraunina sem gert hefur verið fyrir Skógræktina. Fleiri ný myndbönd er líka að finna á myndbandavef Skógræktarinnar.

Námskeið í trjáfellingu og grisjun með keðjusög verður haldið á Reykjum í Ölfusi 18.-20. janúar 2022. Það er öllum opið og hentar þeim sem ekkert kunna á keðjusagir og vilja læra á þær. Einnig þeim sem hafa notað keðjusagir en vilja bæta fellingartækni sína eða vilja öðlast meiri þekkingu á meðferð og umhirðu saga. Hámarksfjöldi þátttakenda er 10. Enn er pláss fyrir tvo nemendur á námskeiðið.