Fréttir og pistlar

Lögaðilar geta fengið tekjuskattstofn sinn lækkaðan um tæpt prósent vegna kostnaðar við skógrækt og fleiri aðgerðir sem leiða til kolefnisbindingar. Fyrirtæki geta því lækkað kostnað sinn við t.d. skógræktarverkefni umtalsvert. Markmið laga um þessi efni er að auka þátttöku fyrirtækja í öllum atvinnugreinum í baráttunni gegn hlýnun loftslags.

Frjósemi er mikil hjá trjánum í Heiðmörk þetta árið og mikið fræ að þroskast. Á laugardag verður Aðalsteinn Sigurgeirsson, fagmálastjóri Skógræktarinnar, í Heiðmörk og leiðbeinir fólki um frætínslu og meðhöndlun trjáfræja.

Skógræktin hefur gefið út tvö stutt myndbönd með leiðbeiningum um hvernig fólk getur borið sig að við söfnun og sáningu á birkifræi. Almenningur getur lagt sitt af mörkum til að breiða út birkiskóglendi landsins á ný og til þess er hvatt í átaki sem Skógræktin og Landgræðslan standa fyrir á þessu hausti í samvinnu við almenning, félög og fyrirtæki.

Á jörðinni Víðifelli í Fnjóskadal í Suður-Þingeyjarsýslu býr Álfhildur Jónsdóttir skógarbóndi. Hún hefur langa sögu að segja af skógrækt þar á bæ. Skógræktin hefur gefið út stutta mynd þar sem Álfhildur gefur okkur glefsur af þessari sögu.

Vindur er ekki eins mikil hindrun fyrir hjólreiðafólk og stundum er af látið. Formaður Landssamtaka hjólreiðamanna bendir á þetta í grein sem hann skrifar í Stundina. Trjágróður hefur til dæmis lægt vind bæði í höfuðborginni og á Akureyri samkvæmt gögnum Veðurstofunnar. Greinarhöfundur hvetur til aukinnar skógræktar til skjólmyndunar í þéttbýli um allt land til að bæta skilyrði til hjólreiða.